Roteiro circular de apenas 2 km de percorrido. Abrazada polo río Miño en todo o seu perímetro, poderemos acceder ao interior da ínsua de Seivane a través dunha atractiva pasarela colgante que nos permitirá camiñar milagrosamente sobre as augas.
Nada máis cruzar a ponte atoparémonos cunha área recreativa, merendero e un refuxio de pescadores. O paseo discorre por unha senda que rodea toda a insua, polo que non ten perda, camiñando sempre pola ribeira do río baixo un denso bosque autóctono de carballos, freixos, salgueiros e acivros.
É un espazo natural protexido de alto valor ecolóxico e ambiental, que forma parte da zona núcleo de Reserva da Biosfera Terras do Miño e da Zona Especial de Conservación (ZEC) Parga-Ladra-Támoga.