​

A Consellería de Sanidade e investigadores da Fundación Pública Galega Instituto de Investigación Sanitaria de Santiago de Compostela (IDIS) poñen en marcha desde hoxe en Galicia o ensaio clínico denominado Sincigal, no cal se convidará a participar máis de 900.000 galegos maiores de 60 anos para comprobar a efectividade da vacina fronte ao virus respiratorio sincitial (VRS).

Polo tanto, ofrecerase a todos os galegos a partir de 60 anos a oportunidade de vacinarse con Abrysvo®, vacina xa aprobada polas autoridades sanitarias para previr o VRS, e coa que o estudo Sincigal pretende demostrar na práctica a redución de ingresos hospitalarios na poboación galega. 

Desta forma, Galicia abordará un ensaio clínico aínda máis ambicioso en número de participantes que Galflu, que contou coa participación de arredor de 135.000 galegas e galegos e que permitiu demostrar os beneficios da vacina de alta carga fronte á gripe para fundamentar a decisión da Consellería de Sanidade de incluíla no calendario vacinal dos maiores de 70 anos.

Modo de participación

Cando calquera persoa maior de 60 anos acuda á súas citas de vacinación fronte á gripe e/ou á covid ou en calquera asistencia sanitaria nos centros de atención primaria ou hospitais asociados ao ensaio clínico, recibirá información sobre o estudo Sincigal e terá a posibilidade de decidir, de maneira voluntaria, se quere participar. 

No caso de aceptar participar, terá un 50 % de posibilidades de recibir a vacina obxecto de estudo ou non, isto verá determinado polo azar a través dunha plataforma informática. 

Desta forma, poderá comprobarse as diferenzas entre as persoas vacinadas e non vacinadas fronte a un virus que, na maioría dos casos, provoca síntomas leves similares a un arrefriado pero que en adultos de idade avanzada ou persoas con patoloxías crónicas pode causar problemas pulmonares graves.

No caso de ser asignado ao grupo de vacinación procederase á administración da vacina durante esa mesma asistencia sanitaria ou nunha quenda posterior, como prefira o participante. Como acontece con todas as demais vacinas, verificarase que non existan contraindicacións para a vacinación. 

No caso de ser asignado ao grupo que non reciba a vacina, non se realizará ningún procedemento adicional asociado á participación no estudo. 

O estudo non implica acudir a ningún seguimento clínico, xa que se obterá a información necesaria da historia clínica de cada paciente para realizar o seguimento de eficacia e seguridade, polo que non será necesario contactar de novo co participante. 

Preto de 250 centros sanitarios e máis de 700 profesionais de enfermería están implicados activamente no desenvolvemento do estudio. 

Este amplo equipo investigador compleméntase co persoal coordinador da Consellería de Sanidade e con investigadores do grupo de investigación en xenética, vacinas e enfermidades infecciosas do IDIS que lidera o doutor Federico Martinón, investigador principal do estudo Sincigal. 

Para máis información sobre o estudo ou resolver calquera dúbida, pódese contactar co centro de atención informativa chamando ao teléfono gratuíto 900 842 217.

Efectividade demostrada

O primeiro bebé no mundo en inmunizarse fronte ao virus respiratorio sincitial foi en Galicia, cando a Consellería de Sanidade, no ano 2023, incluíu esta protección no calendario vacinal. Isto permitiu reducir en máis dun 90 % as hospitalizacións polo virus que provoca a bronquiolite en nenos inmunizados.

Desta forma, este novo ensaio clínico Sincigal contribuirá a decidir con rigor científico quen debe vacinarse fronte ao VRS e cando. 

O estudo enmárcase na estratexia galega de saúde pública pragmática, que integra a investigación clínica co sistema sanitario real para xerar evidencias útiles que permitan optimizar a toma de decisións sobre políticas de vacinación.