A directora xeral de Saúde Pública, Carmen Durán, inaugurou esta mañá na Cidade da Cultura a III Xornada Galega de Saúde Pública, onde especialistas desta área sanitaria presentaron os principais proxectos no que xa se están a traballar na actualidade, así como cara onde avanza o ámbito da epidemioloxía e a prevención.

Durante a súa intervención, Durán explicou a importancia que terán as novas tecnoloxías, como é o caso da incorporación da Intelixencia Artificial ao eido da Saúde Pública. Unha ferramenta que a Xunta xa emprega para optimizar o diagnóstico do cancro de mama e ser máis precisos na detección de posibles lesións malignas en fases temperás.

Xunto co emprego do Data Driven (análise de datos dixitais para mellorar a toma de decisións), a responsable sanitaria tamén puxo o foco no papel que xogará a xenética para actuar de forma preventiva ante o risco de padecer certas enfermidades. Nesta liña, destacou o Proxecto Xenoma Galicia e os proxectos de investigación das metabolopatías en nenos.

“A xenética trazará o futuro da Saúde Pública”, incidiu, de acordo ao novo abano de posibilidades que achega o coñecemento do perfil xenético da poboación.

No que atinxe á vixilancia epidemiolóxica e ao control das enfermidades, a directora xeral salientou que xa se están a producir cambios no seu modelo actual. Un novo escenario no que xa se están a empregar novos indicadores, como pode ser a posta en marcha da Rede Sentinela de Farmacias coa que a Administración sanitaria avalía a prevalencia da gripe na comunidade galega. 

Segundo apuntou Carmen Durán, o ámbito da Saúde Pública tamén debe ser quen de ampliar os niveis de participación cidadá. Así, deberá ter a capacidade de escoitar as necesidades da poboación e acadar unha maior participación,  tanto nos programas e actividades vinculadas aos estilos de vida saudable, como no que respecta á súa participación nos programa poboacionais dos cribados de cancro.