​

O conselleiro de Sanidade, Antonio Gómez Caamaño, visitou hoxe o Laboratorio de Microbioloxía do Hospital Universitario Lucus Augusti, con motivo da conmemoración, mañá, 26 de marzo, do Día mundial da prevención do cancro de colo de útero. Co obxectivo de concienciar sobre a prevención desta enfermidade, subliñou que o programa de detección precoz de cancro de cérvix da Xunta permitiu detectar en 4 anos 45 casos de cancro, o 71 % deles en estado inicial.

No seu percorrido pola sala de recepción de mostras e polo laboratorio, o conselleiro de Sanidade estivo acompañado polo delegado territorial da Xunta en Lugo, Javier Arias, a directora xeral de Saúde Pública, Carmen Durán, e o xerente da área sanitaria de Lugo, A Mariña e Monforte de Lemos, Ramón Ares.

Gómez Caamaño resaltou o labor da unidade do HULA que procesa máis de 460 mostras ao día, procedentes do programa de cribado en toda Galicia, e que está declarado de referencia para outros sistemas sanitarios que buscan replicar o modelo da sanidade pública galega. De feito, a Consellería de Sanidade e a compañía Roche Diagnostics asinarán un convenio para organizar visitas e demostracións dos equipos e tecnoloxías que emprega a unidade de análise do programa poboacional de cribado de cancro de cérvix de Lugo.

Poboación diana

Este programa de cribado forma parte do traballo de detección precoz da Xunta e conta cunha participación efectiva de case o 60 % das máis de 253.000 invitacións enviadas. Isto tradúcese na realización de probas a máis de 151.500 mulleres de 35 a 65 anos.

A política de prevención do Goberno galego compleméntase coa vacina fronte ao virus do papiloma humano (VPH). Galicia foi referente na súa inclusión no ano 2008 na poboación infantil feminina. En 2022 ampliouse tamén de xeito pioneiro aos nenos varóns e o ano pasado elevouse a idade ata os 18 anos no caso dos rapaces para aumentar a protección de grupo.

Así, redúcese a posibilidade de contaxio de VPH e, co cribado de cancro de cérvix, pode ser detectado e tratado a tempo, reducindo de maneira significativa a súa incidencia e mortalidade.