​

A Xunta, a través da Consellería de Sanidade publicou no Portal de Contratos Públicos​ a licitación, por un importe de 42.398 euros, do contrato para a realización de intervencións para o fomento da prevención e o cribado do virus de inmunodeficiencia Humana (VIH) e do virus da hepatite C (VHC) en zonas e eventos de ocio.

A través destas intervencións ofrecerase información e asesorarase sobre os riscos concretos destas infeccións de transmisión sexual; fomentarase a conciencia e unha maior percepción de risco en determinadas prácticas; poñerase á disposición dos cidadáns folletos, guías e outros materiais preventivos; e facilitarase, a través de probas rápidas en fluído oral, totalmente anónimas, o diagnóstico precoz do VIH e do virus da hepatite C.

Así mesmo, posibilitarase a aquelas persoas con resultado reactivo ou dubidoso á proba rápida o acceso ao sistema sanitario.

As localidades e emprazamentos das intervencións inclúen zonas das catro provinciais galegas. Ademais, as localizacións reunirán unha serie de características entre as que están intervencións en zonas de ocio (fundamentalmente nocturno) e en localidades que reciban aglomeracións puntuais (festas patronais ou gastronómicas), así como en festivais ou eventos similares (musicais, culturais, entre outras).

A empresa adxudicataria desta actividade deberá coordinarse cos técnicos do Servizo de Prevención e Control de Enfermidades do Centro Galego para o Control e Prevención de Enfermidades (Cegace), para a planificación e cronograma das intervencións.

Estratexia de cribado recomendada por organismos internacionais

Para o desenvolvemento do servizo deberase contar cunha unidade móbil para o desprazamento aos lugares que se determinen na realización das intervencións, o material informativo divulgativo e preventivo, as probas rápidas de VIH e VHC para mostra de fluído oral, así como o persoal encargado de realizar as  intervencións tanto dentro do vehículo como movéndose pola zona.

As probas a realizar enmárcanse nunha estratexia de cribado recomendada polos organismos internacionais para realizar as probas rápidas fóra dos centros sanitarios. 

Esta iniciativa, que coordinará a Dirección Xeral de Saúde Pública da Consellería de Sanidade, pretende mellorar as actuacións existentes no eido da prevención do VIH e do virus da hepatite C, e fomentar o uso de probas rápidas de detección precoz, achegando estas actividades aos lugares e momentos de ocio e de especial interese para captar a un maior número de persoas vulnerables, que habitualmente non acoden ao sistema asistencial sanitario ordinario.

Ademais, este programa, contribuirá a avaliar a implantación das medidas de cribado de maneira permanente e xeneralizada noutras contornas comunitarias de Galicia como iniciativas de saúde pública fronte ás infeccións polo VIH e polo virus da hepatite C.

Polo tanto, con este tipo de medidas, Galicia segue a avanzar nos pasos dados nos últimos anos para combater as infeccións de transmisión sexual.