A mortalidade evitable é considerada un bo indicador para avaliar o efecto das intervencións sanitarias sobre a saúde da poboación. En España, creouse un grupo para o consenso na mortalidade evitable que publicou en 2006 unha lista consensuada de 34 causas de morte evitable, xunto ao período de idade no que terán esta consideración. Estas causas clasificáronse en dous grupos: causas susceptibles á intervención polos servizos de asistencia sanitaria (SAS) e causas susceptibles á intervención de política sanitaria intersectorial (PSI). Nas táboas seguintes preséntase a lista de causas de cada grupo coas idades nas que se consideran evitables e os códigos das 9ª e 10ª Clasificación Internacional de Enfermidades (CIE9 e CIE10, respectivamente).