Cada infografía céntrase nun ámbito concreto e responde a tres preguntas esenciais: en que consiste o risco, a quen afecta en maior medida e que se pode facer para previlo ou minimizar os seus efectos. Entre os contidos dispoñibles neste espazo atópanse:

• Calor e frío: recomendacións para facer fronte ás temperaturas extremas, con especial atención ás persoas máis vulnerables.
• Incendios forestais: os efectos do fume sobre a saúde e as precaucións que se deben tomar durante e despois dun incendio.
• Pole: o calendario polínico de Galicia e pautas para persoas alérxicas ou sensibles.
• Calidade do aire: información sobre a contaminación por partículas (PM2,5 e PM10) e as medidas para reducir a exposición.
• Radon: que é este gas radioactivo de orixe natural, como se detecta no fogar e que medidas correctivas existen.

Todos estes materiais están deseñados para facilitar a súa comprensión e o seu uso práctico no día a día, tanto por parte da poboación xeral como de persoas especialmente vulnerables (persoas maiores, menores, embarazadas ou con patoloxías previas) e dos profesionais que traballan no seu coidado. Este apartado actualízase de forma continua co fin de ofrecer á cidadanía galega información actualizada e ferramentas útiles para o coidado da súa saúde e da súa contorna.