Laboratorio de Cántigas Novas 2026, a segunda edición deste proxecto de creación nova, a partires da música galega de tradición oral, no que, desde unha visión contemporánea, exploraremos a forma de compoñer novas cancións, de forma individual e colectiva.

O LAB, unha iniciativa do Concello de Ortigueira, organizado desde a área formativa do Festival de Ortigueira e que conta cos colaboración e coordinación da Escola de Gaitas de Ortigueira, está co-dirixido por Ugia Pedreira e Óscar Górriz, e contará nesta segunda edición coas mestrías de Manolo Rico, Mondra, Sergio de la Ossa, Dores Tembrás, Pedro Pascual e Pablo Hernández Mejías.

A maiores, este ano iniciamos as novas sesións OFF-LAB, obradoiros abertos a todo o público, nos que contaremos con Fransy González, Lupe Blanco e Ramón Dopico. Tamén, como parte da programación, organizaranse foliadas coa comunidade da comarca.