Nesta ruta na entrada da Ribeira Sacra do Miño cada pedra agocha unha mensaxe aínda sen descifrar. O vestixio que visitaremos será o mosteiro de San Pedro de Rocas, no concello de Esgos. A orixe como centro relixioso vincúlase a un eremitorio escavado na rocha, e considérase a evidencia máis remota do monacato en Galicia. A súa data de fundación sitúase no ano 573, data que aparece gravada nunha inscrición ou epígrafe coñecida como lápida fundacional. Segundo a lápida, este mosteiro de Rocas foi herdado por monxes anacoretas, que elixiron esta contorna de Esgos, situado a 650 m de altitude, para retirarse a unha vida austera e de oración. A ruta inclúe un magosto festivo ao rematar.