​

A Consellería de Sanidade, en virtude do último informe elaborado pola Dirección Xeral de Saúde Pública referido á semana 11 do presente ano, que rematou o día 16 deste mes, dá por terminada a onda do Virus Respiratorio Sincitial (VRS), ao levar dúas semanas por baixo do 3 % de positividade.

A evolución da onda epidémica reflicte que na semana 52, última do ano pasado, acadouse o pico e, a partir de entón, a porcentaxe de positividade mantivo unha tendencia descendente. 

Respecto das hospitalizacións en lactantes, produciuse na semana 11 deste ano un ingreso hospitalario no grupo de bebés nados entre abril e setembro. No que atinxe aos lactantes menores de dous meses, dende a semana nove non se produciu ningún ingreso hospitalario. No que se refire aos menores de seis meses, a taxa de hospitalización descendeu en comparación coa semana anterior, xa que non houbo ningún ingreso.

O informe recolle, así mesmo, que a taxa de hospitalización no grupo de nados entre o un de abril do 2023 e o 31 de marzo de 2024, mantívose estable en relación á semana previa, xa que houbo un ingreso nas dúas.

Polo que se refire aos nenos e nenas menores de dous anos, a taxa de hospitalización mantívose estable (houbo dúas hospitalizacións ao igual que na semana anterior).  Sinalar, así mesmo, que nos nenos e nenas de 2 a 5 anos, non se produciu ningunha hospitalización, polo que descendeu respecto da anterior, na que houbera un ingreso.

No que atinxe aos adultos maiores de 60 anos, Saúde Pública informa que nesta semana a taxa de hospitalización descendeu respecto da anterior, ao producirse doce ingresos fronte aos 24 da semana anterior. Nos adultos maiores de 80 anos, a taxa foi menor á da semana anterior, ao producirse nove ingresos fronte aos 16 da anterior.

En referencia á asistencia en atención primaria por bronquiolite en menores de dous anos, nesta semana a taxa de consultas aumentou lixeiramente respecto da anterior no grupo de nados entre abril e setembro e nos menores de 2 e 6 meses. 

Sinalar, por último, que na semana 11 a cobertura da inmunización en campaña superou o 90 % e en recaptación acada o 89, 4 %.

Galicia pioneira

A campaña de inmunización fronte ao Virus Respiratorio Sincitial en Galicia no 2024-2025 estableceuse para tres grupos diana. Os nados entre o 1 de outubro de 2022 e o 31 de marzo de 2024 e con factores de risco; a recaptación para os nados entre o 1 de abril e o 22 de setembro de 2024 que reciben unha dose ao comezo da tempada, e os nados dende o 23 de setembro de 2024 ata o 31 de marzo de 2025, que reciben unha dose tras o nacemento.

O número de nenos e nenas inmunizados acada os 12.386, sendo a cobertura de inmunización nos grupos de risco do 100 %.

Destacar, así mesmo, que a inmunización para previr a infección causada polo Virus Respiratorio Sincitial introduciuse de xeito pioneiro no mundo no calendario de inmunización galego na tempada 2023-2024, acadando unha elevada efectividade na prevención da hospitalización.