A Consellería de Sanidade, a través do portal Vida Saudable​, difunde pautas de nutrición coas necesidades específicas das mulleres ao longo das distintas fases do seu ciclo vital.

Ao longo da vida adulta, as mulleres experimentan cambios fisiolóxicos desde o ciclo menstrual ata a menopausa que condicionan o seu metabolismo, as súas necesidades nutricionais e a súa relación coa alimentación e a actividade física. 

Neste contexto, inclúense recomendacións nutricionais para reducir os efectos do síndrome premenstrual. Debido a que a proxesterona se atopa nos seus niveis máis elevados, potencian o apetito, mentres que se produce un descenso de estróxenos que modulan a saciedade, o cal explica a maior sensación de fame, que se prefiran alimentos densos en enerxía, que se produza inchazón abdominal e retención de líquidos, así como os cambios no estado de ánimo. 

As revisións recentes suxiren que certos patróns dietéticos antiinflamatorios, ricos en verduras, froitas, peixe azul, noces e aceite de oliva virxe extra, poden axudar a modular os síntomas nalgunhas mulleres, aínda que a resposta sexa individual.

Entre outros temas, tamén se salienta a importancia de manter niveis adecuados de vitamina D na menopausa, xa que é a etapa da vida das mulleres na que comeza unha perda acelerada da masa ósea así como unha redución da masa muscular. A vitamina D é clave para previr fracturas e asegurar a absorción de calcio, para o músculo, a inmunidade e o estado de ánimo.

Recoméndase combinar unha exposición solar moderada con alimentos ricos en vitamina D como son: peixe azul, ovos, cogomelos e champiñóns marróns ou lácteos. 

Por outra banda, lémbrase que a Organización Mundial da Saúde recomenda que as mulleres adultas realicen, á semana, entre 150 e 300 minutos de actividade aeróbica moderada (camiñar rápido, bicicleta, bailar ou traballar no xardín) ou 75-150 minutos de actividade vigorosa (correr, deportes competitivos, natación rápida).