​

A Consellería de Sanidade, a través da Dirección Xeral de Saúde Pública, publica na súa páxina web​ o informe de actividade das infeccións respiratorias agudas correspondente á semana 11, que determina que a intensidade da gripe en Galicia segue a ser baixa e a tendencia estable.

Segundo os datos, a taxa de consultas por gripe nos servizos de atención primaria aumentou un 5 % con respecto á semana previa, con 44,8 consultas por 100.000 habitantes. 

Por grupos de idade, o aumento rexistrouse en todos agás no de 20 a 59 anos. O grupo coa maior taxa de consultas foi de novo o de 0 a 4 anos, con 74,8 consultas por 100.000 habitantes. Por áreas sanitarias, a taxa de consultas foi superior á da semana anterior en todas, agás nas de Santiago, Ourense e Vigo. 

A rede de farmacias sentinela, que nesta campaña remiten os seus datos á Dirección Xeral de Saúde Pública, reflicte que a taxa de dispensación de antigripais e de probas de antíxenos se mantivo estable con respecto á semana previa.

En canto aos ingresos hospitalarios, na semana 11 do ano ingresaron 242 persoas con gripe confirmada, un 4 % menos que na semana anterior (252). A taxa de ingresos no conxunto da poboación foi de 8,9 por 100.000 habitantes. Aumentou lixeiramente no grupo de idade de 5 a 19 anos e, de maneira más importante, no de maiores de 80 (cun incremento do 32,1 %). En comparación coa semana anterior, a taxa de ingresos aumentou nas áreas sanitarias da Coruña e de Pontevedra e, de maneira máis leve, na de Santiago e na de Vigo.

No que vai de tempada, notificáronse 2.651 ingresos por gripe, a maioría deles, 2.251, con virus do tipo A.

Respecto da positividade das mostras estudadas para virus do tipo A, foi do 17,9 %, o que supón un descenso respecto da semana anterior, que foi do 19,7 %. A positividade das mostras estudadas para virus do tipo B foi do 1,2 %, polo que a positividade dos virus da gripe foi do 19,1 %, inferior á da semana anterior (21,1 %).

Evolución covid e VRS

O informe de actividade das infeccións respiratorias agudas indica que ingresaron 16 persoas con covid confirmada, o que supón un 27 % inferior á semana previa na que houbo 22 hospitalizacións. En relación ás áreas sanitarias, a taxa de ingresos mantívose estable en todas elas.

Pola súa banda, no que atinxe ao virus respiratorio sincitial (VRS), a taxa de ingresos no conxunto da poboación foi inferior á da semana anterior, de 0,5 ingresos por 100.000 habitantes. Mantívose estable, tanto por grupos de idade como por áreas.

Estimación

Segundo se recolle no informe, a estimación puntual do modelo de predición suxire que, a taxa de consultas por gripe descenda de 44,8 a 43,3-41,5 consultas por 100.000 habitantes nas vindeiras dúas semanas respectivamente. 

Aínda que polos datos do informe parece que se está a producir un enlentecemento no descenso da actividade gripal, hai que ter en conta que a información reflectida neste informe corresponde á semana posterior á festividade do entroido, a cal podería estar distorsionando os datos. Polo tanto, o aumento observado na taxa de consultas probablemente sexa de carácter puntual, o que haberá que confirmar na vindeira semana. 

A Xunta lembra a recomendación do uso da máscara en pacientes con síntomas respiratorios, ademais dos seus acompañantes e visitas, e no caso dos profesionais que os atenden, así como en determinados grupos de risco ou dispositivos asistenciais como poden ser as urxencias hospitalarias.