​

A Consellería de Sanidade publicou hoxe, no seu Perfil do Contratante​, a licitación por 108.900 euros do servizo de recollida de mostras no Laboratorio de Saúde Pública de Galicia e o seu traslado a laboratorio para realizar determinacións de dioxinas dentro do Plan de control oficial da cadea alimentaria 2021-2025.

As dioxinas e os compostos similares ás dioxinas son contaminantes ambientais persistentes, fundamentalmente subprodutos da queima ou os procesos industriais. Ademais, os  bifenilos policlorados (PCB) utilizábanse na fabricación de equipos eléctricos, tintas, adhesivos, produtos ignífugos e pinturas. Debido á súa gran persistencia e á súa elevada solubilidade en graxas, os PCB aínda persisten no ambiente e poden acumularse no tecido adiposo dos animais e nos diferentes niveis da cadea alimenticia.

No marco das competencias de control dos alimentos á disposición de consumidores en Galicia, a Dirección Xeral de Saúde Pública licita a recollida de mostras de produtos alimenticios de carne e derivados cárnicos; peixes, moluscos, crustáceos e cefalópodos; aceites, graxas e manteigas; ovos e os seus derivados.

As empresas interesadas nesta licitación teñen de prazo ata o 1 de abril para presentar as súas ofertas.