​

A Consellería de Sanidade publicou hoxe, no seu Perfil do Contratante, a licitación da impresión e subministro dos materiais da carpeta de saúde infantil por 45.422,19 euros, que se adapta ás ampliacións do calendario vacinal e do cribado neonatal, os máis completos do Estado.

Esta carpeta de saúde infantil, incluída na Cesta Benvida que se entrega aos recén nados nos hospitais, achégalles ás familias os materiais e a documentación fundamental para os primeiros días de vida do bebé. En concreto, trátase do material para remitir mostras de sangue e ouriños para a realización das probas de detección de metabolopatías e o impreso para incluír os bebés na base de datos de tarxeta sanitaria.

Inclúese a cartilla vacinal, de uso obrigatorio para menores de 15 anos e que xa se precisa no propio hospital porque a primeira dose da vacina da Hepatite B se administra na propia maternidade.

Adquiriranse 15.000 unidades da nova carpeta de saúde infantil que pasa a denominarse carpeta ‘Cóidate-cóidame’.

A nova carpeta inclúe un código QR para que as familias poidan consultar, de xeito permanente, o calendario galego de inmunización ao longo da vida e as súas actualizacións. Este novo formato inclúe as últimas novidades incorporadas ao calendario vacinal, como é o caso da vacina fronte ao Virus Respiratorio Sincitial (VRS),  que mantén a Galicia co programa de vacinación máis completo do mundo.

Xunto con este código QR e a cartilla de vacinación, tamén se achega a documentación e o material necesario para participar no Programa de detección precoz de enfermidades xenéticas, endócrinas e metabólicas. Esta iniciativa permite diagnosticar e tratar enfermidades antes de que os síntomas sexan clinicamente evidentes e sitúa o sistema sanitario galego como líder a nivel estatal.

Tras a recente incorporación de tres novas patoloxías -en novembro do pasado ano-, a sanidade galega é quen de detectar de xeito temperá un total de 37 metabolopatías conxénitas primarias e outras 14 de tipo secundario.

As empresas interesadas nesta licitación teñen de prazo ata o 24 de marzo para presentar as súas ofertas.